周日早上，茶樓如平常般熱鬧，兩個茶客坐在金漆龍鳳下的圓檯一邊讀報一邊嘆茶。

茶客甲拿起報紙娛樂版大聲話：「你睇下李大美人同阿亨亨拖手仔拖得幾煙韌，十指緊扣，成對小情人咁，今鋪真係激鬼死大劉呀。」

茶客乙呷了一口濃茶，不慌不忙地說：「咁你估依家最開心係邊個？」

茶客甲笑說：「仲駛講嘅，梗係呢對甜蜜蜜嘅拖友啦。」

茶客乙：「當然唔止佢地兩個……」

茶客甲瞪大眼：「咁仲有邊個？你想話佢哋兩個嘅老竇阿媽？」

茶客乙夾起燒賣：「你都傻嘅，兩個都係情場老手，你以為佢老竇阿媽仲會旨意佢哋結婚生仔咩。依家至happy果個我話係四叔啦。」

茶客甲狐疑：「四叔？又關佢咩嘢事？」

茶客乙再喝一口茶：「乜唔關佢事？你睇唔到啲報紙雜誌點寫咩？都唔知當初邊個記者咁好創意，諗出『嘉亨戀』呢個名堂，依家佢哋有咩嘢風吹草動都登娛樂頭條，搞到兩個好似免費做咗嘉亨灣果個盤嘅代言人咁，真係好過登廣告呀，咁你話四叔點會唔開心？真枉你個個星期買四五本八卦雜誌，咁都諗唔到。我睇呢樣嘢大劉咁聰明實諗到啦，唔係佢之前點會無喇喇登報賀李美人生日，仲唔怕肉麻自認the one，分咗手咁多年都冇見佢咁有心。你以為佢唔想衰俾亨亨睇，咁就大錯特錯啦。」

茶客甲笑道：「咁樣講法，佢兩隻嘢一日未散，阿四叔咪笑到見牙唔見牙囉。」

說罷，兩人哈哈大笑，似乎也成了這段「嘉亨戀」的受惠者。